من بعد الهجوم العسكري الكبير اللي دارو الكيان الصهيوني على إيران في 13 يونيو 2025 في عملية سميتها “Rising Lion” واللي ضربو فيها مراكز نووية وعسكرية حساسة وقتلو قادة كبار في الحرس الثوري الإيراني، إيران دخلات الورقة اللي ولات اليوم من أخطر الأسلحة ألا وهي الحرب السيبيرانية واللي هي هجمات رقمية كتوقع في العالم الإفتراضي ولكن كتأثر على العالم الواقعي.
إيران اليوم كتركز على الهجمات السيبيرانية باش تخلق توازن جديد في الردع خصوصا من بعد ما تضررات بنيتها الدفاعية والطيران ديالها في الهجوم ديال الكيان الصهيوني والمصادر الأمنية كايقولو أن إيران كتحاول تستهدف البنية التحتية ديال الكيان الصهيوني بحال شبكات الماء والكهرباء والنقل وحتى القطاعات العسكرية بإستعمال برامج خبيثة وأدوات متطورة بحال مالوير Wiper اللي كايمسح البيانات و هجمات DDoS اللي كايطيحو السيرڤورات و مالويرز آخرن مخصصين لأنظمة التحكم الصناعية ICS وSCADA.
هاد النوع من الهجمات سبق داروه من قبل في هجمات على أنظمة الماء في أمريكا وعلى السكك الحديدية فأذربيجان، إيران عندها مجموعات هاكرز معروفين عالمياً بحال APT34 المعروفة ب OilRig و MuddyWater و CyberAv3ngers و هادو خدامين تحت أوامر مباشرة من الحرس الثوري و وزارة الإستخبارات، وفي المقابل الكيان الصهيوني عندهم جيش سيبراني قوي ومتقدم بزاف بحال وحدة 8200 التابعة للجيش واللي عندها قدرة هجومية ودفاعية رقمية متقدمة بزاف في :
▪تحليل البيانات الضخمة “Big Data” باش إراقبو تحركات الخصوم.
▪تطوير برمجيات خبيثة متقدمة.
▪تنفيذ هجمات إلكترونية مركزة بسرعة عالية.
▪تأمين البنية الرقمية العسكرية والمدنية.
الصراع بين إيران والكيان الصهيوني ما بقاش محصور في الميدان العسكري التقليدي، ولكن دخل لعالم الحرب الهجينة اللي فيه النزاعات الرقمية والسيبرانية كتكون بنفس قوة الهجمات التقليدية، ولا أحيانا أكثر تأثيرا، حيث كل طرف كايسعى يدمر قدرات الطرف الآخر الرقمية، ويشل القدرات ديالو على الحرب، سواء عبر تعطيل الإتصالات – شبكات الكهرباء – الأنظمة العسكرية أو حتى البنية التحتية المدنية الحيوية.
هاد المعركة السيبرانية كاتحتاج لتقنيات متطورة بزاف بحال الذكاء الإصطناعي في تحليل الأنماط السيبرانية، والتعلم الآلي لإكتشاف الهجمات، وآستعمال أنظمة الدفاع السيبراني المتقدمة اللي كتدمج بين الجدران النارية – نظم الكشف عن التسلل “IDS/IPS” وأنظمة المراقبة المستمرة.
بإختصار : إيران اليوم كتقاتل مع الكيان الصهيوني في ميدان جديد الحرب السيبرانية اللي كتفرض تحديات تقنية وسياسية كبيرة على مستوى العالم وكتبين كيفاش التكنولوجيا كتدخل بقوة في النزاعات الحديثة وتأثيرها كايتعدى العالم الإفتراضي باش يوصل لعالمنا الواقعي.
